အဆုတ်ကင်ဆာ
အဆုတ်ကင်ဆာသည် အဆုတ်၏ တစ်သျှူးမှ စတင်ဖြစ်ပေါ်ပါသည်။ အထူးသဖြင့် လေအဝင်အထွက် လမ်းကြောင်းဆဲလ်နံရံများမှ ဖြစ်လေ့ရှိသည်။ အနုကြည့်မှန်ပြောင်းအောက်မှာ ကြည့်၍ ဆဲလ်များသည် ဘယ်လိုပုံရှိသလဲပေါ် မူတည်၍ အဓိကနှစ်မျိုးကတော့ small cell lung cancer ( SLC ) နှင့် non small cell lung cancer ( NSLC ) ဖြစ်ပါသည်။
Non-small cell lung cancer (NSCLC)
NSLC သည် အဆုတ်ကင်ဆာများတွင် (၈၀)ရာခိုင်နှုန်း လောက်ဖြစ်သဖြင့် အဖြစ်များသော အဆုတ်ကင်ဆာဖြစ်ပါသည်။ SLC လောက်တော့ မပြင်းထန်ပါ။ စောစောတွေ့လျှင် ခွဲစိတ်ခြင်း နှင့် ( သို့ ) ဓာတ်ရောင်ခြည်ပြကုသခြင်း ၊ ဆေးသွင်းကုသခြင်း တို့ဖြင့် ပျောက်ကင်းနိုင်ချေ ရှိပါသည်။
Small cell lung cancer ( SLC )
SLC သည် မြန်မြန်ကြီးထွားပြီး သွေးကြော နှင့် ပြန်ရည်ကြောထဲသို့ ပျံ့နှံ့လွယ်ပါသည်။ ရောဂါသိရှိချိန်မှာလျှင်ပင် အဆင့်နောက်ကျနေပြီဖြစ်ပါသည်။ များသောအားဖြင့် ကင်ဆာဆေးသွင်းခြင်း တစ်ခုတည်း သို့မဟုတ် ဓာတ်ရောင်ခြည်ပြကုသခြင်းနှင့် ပေါင်း၍ ကုသရပါသည်။
ဆရာဝန်များကတော့ ဒီလူက အဆုတ်ကင်ဆာဖြစ်နိုင်ပြီး အခြားလူက မဖြစ်နိုင်ဟု ပြောလေ့မရှိပါ။ သို့သော် အချို့ဖြစ်နိုင်ချေများ ရှိသောသူကတော့ အခြားသူထက်စာလျှင် အဆုတ်ကင်ဆာဖြစ်နိုင်ဖို့ရာများပါသည်။
ဆေးလိပ်သောက်ခြင်းသည် အဆုတ်ကင်ဆာအတွက် အဓိကဖြစ်နိုင်ချေ ဖြစ်ပါသည်။ တစ်ကမ္ဘာလုံးအဆုတ်ကင်ဆာဖြစ်သူများ ၏ (၈၀) ရာခိုင်နှုန်းသည် ဆေးလိပ်သောက်ခြင်းကြောင့် ဖြစ်ပါသည်။ ဆေးလိပ်ငွေ့ကြောင့် အဆုတ်ရှိဆဲလ်များ ပျက်စီးစေပါသည်။ အချိန်ကြာလာတာနှင့်အမျှ ပျက်စီးသွားသော ဆဲလ်များကနေ ကင်ဆာအဖြစ်ပြောင်းသွားပါသည်။ ထို့ဖြင့် စီးကရက်သောက်ခြင်း၊ ဆေးပြင်းလိပ် ကြောင့် အဆုတ်ကင်ဆာဖြစ်စေပါသည်။ ဆေးလိပ်မသောက်သူများတွင် ဆေးလိပ်ငွေ့ရှုမိလျှင်လည်း ကင်ဆာဖြစ်စေပါသည်။ ဆေးလိပ်ငွေ့များများရှုမိလျှင် အဆုတ်ကင်ဆာဖြစ်နိုင်ချေ ပိုများပါသည်။ ထို့နည်းတူ ဆေးလိပ်သောက်သော အသက်အရွယ်ပိုစောလျှင် နှစ်ကြာစွာပိုသောက်လျှင် အဆုတ်ကင်ဆာဖြစ်နိုင်ချေ ပိုများပါသည်။
အဆုတ်ကင်ဆာဖြစ်နိုင်သော အခြားအချက်များမှာ - အလုပ်နေရာများတွင် ရေဒွန် ( ရေဒီယိုသတ္တိကြွပစ္စည်း ) ဓာတ်ရောင်ခြည်ထိခြင်း ၊ ကျောက်မီးသွေးငွေ့၊ ကျောက်မှုန့် ၊ အာဆင်းနစ် ၊ ခရိုမီယမ် ၊ နီကယ် နှင့် ကတ္တရာစေးများ - ထိတွေ့မှုများခြင်း ၊ လေထုညစ်ညမ်းသောနေရာများတွင် နေထိုင်ခြင်း နှင့် အသက်အရွယ်ကြီးခြင်းတို့ကြောင့် ဖြစ်နိုင်ပါသည်။ မိသားစုတွင် အဆုတ်ကင်ဆာ ဖြစ်ဖူးသော ရာဇဝင် ရှိလျှင် လည်း ဖြစ်နိုင်ချေ အနည်းငယ်များပါသည်။ အဆုတ်ကင်ဆာတစ်ကြိမ်ဖြစ်ဖူးထားလျှင်လည်း ဒုတိယအဆုတ်အကျိတ်ဖြစ်နိုင်ချေများပါသည်။
အဆင့်စောသော အဆုတ်ကင်ဆာတွင် လက္ခဏာမပြတတ်ပါ။ သို့သော်ကင်ဆာကြီးထွားလာသည်နှင့် အမျှ အဖြစ်များသော လက္ခဏာများမှာ -
- ချောင်းဆိုးခြင်းသည် ပိုမိုဆိုးလာခြင်း ( သို့) မပျောက်ခြင်း
- အသက်ရှုရခက်လာခြင်း ( သို့) မောလွယ်ခြင်း
- တောက်လျှောက် ရင်ဘတ်အောင့်နေခြင်း
- ချောင်းဆိုးသွေးပါခြင်း
- အသံအောလာခြင်း
- နမိုးနီးယား ကဲ့သို့သော အဆုတ်ပိုး ခဏခဏဝင်ခြင်း
- အချိန်ပြည့်မောပမ်းနွမ်းနယ်နေခြင်း
- အကြောင်းရင်းမရှိ ကိုယ်အလေးချိန်ကျခြင်း
များသောအားဖြင့် ဤလက္ခဏာများသည် ကင်ဆာကြောင့်မဟုတ်လည်း အခြားသော ကျန်းမာရေးပြဿနာများကြောင့်လည်း ဖြစ်နိုင်ပါသည်။ သို့သော် တစ်စုံတစ်ယောက်တွင် ဤလက္ခဏာများ ဖြစ်နေတာ ကြာနေလျှင် ဆရာဝန်နဲ့ ရောဂါရှာဖွေပြီး စောစီးစွာ ကုသဖို့လိုပါသည်။
အဆုတ်ကင်ဆာ လက္ခဏာများ ရှိလျှင် သင့် ဆရာဝန်သည် အမှန်တကယ် ကင်ဆာဟုတ်မဟုတ်(သို့) အခြားသော ကျန်းမာရေးအခြေအနေများကို ရှာကို ရှာရပေမည်။ သင်သည် သွေးစစ်ခြင်း ၊ ဓာတ်မှန်ရိုက်ခြင်း ( သို့ ) ပုံရိပ်မြင်စက် CT Scans ရိုက်ခြင်းများ လိုအပ်ပါသည်။
ကိုယ်တိုင် လက်ဖြင့် စမ်းသပ်စစ်ဆေးခြင်း ( Physical Examination )
- ရင်ဘတ်ဓာတ်ရိုက်ခြင်း ( Chest X Ray )
- CT Scan ရိုက်ခြင်း
သင့်ဆရာဝန်သည် အဆုတ်ကင်ဆာဟု သံသယရှိလျှင် ရောဂါသေချာသိရှိရန် ဆဲလ်နမူနာများ စစ်ဆေးဖို့ရန်လိုပါသည်။
- တံတွေးမှ ဆဲလ်ကို စစ်ဆေးခြင်း - အဆုတ်မှ တံတွေးပြစ်ပြစ်ကို ထွေးထုတ်ပြီး ကင်ဆာဆဲလ်များကို ဓာတ်ခွဲခန်းတွင် စစ်ဆေးရပါမည်။
- လေပြွန်တွင်း မှန်ပြောင်း ဖြင့် ကြည့်ခြင်း - ဆရာဝန်သည် လေပြွန်တွင်းကြည့် မှန်ပြောင်းဖြင့် နှာခေါင်း သို့ ပါးစပ်မှတဆင့် အဆုတ်တွင်း သို့ ထိုးကြည့်ပြီး ဆဲလ်နမူနာကို အပ်ဖြင့် ၊ ဘရပ်ရှ်ဖြင့် ( သို့ ) အခြား ပစ္စည်းဖြင့် ယူနိုင်ပါသည်။ ဆရာဝန်သည် ယူထားသောနေရာကို ရေဖြင့်ဆေး၍ ရေထဲမှ ဆဲလ်ကို ယူပါသည်။
- အပ်အသေးလေးဖြင့် စုပ်ယူခြင်း - ဆရာဝန်သည် အပ်သေးသေးပါးပါးလေးဖြင့် အဆုတ်မှ သို့ ပြန်ရည်ကျိတ်မှ တစ်သျှူး ( သို့ ) အရည်ကို ယူပါသည်။
- ခွဲစိတ်၍ အသားစယူခြင်း - အချို့ အသားစယူရန် ခက်ခဲသော အခါများတွင် ရင်ခေါင်းကို ခွဲစိတ်၍ အဆုတ်အကျိတ် ( သို့ ) ပြန်ရည်ကျိတ်မှ တိုက်ရိုက် အသားစယူနိုင်ပါသည်။
အဆုတ်ကင်ဆာလို့ သိရှိပြီးနောက် ကင်ဆာဆဲလ်များသည် အဆုတ်မှ အခြားအစိတ်အပိုင်းသို့ ပျံ့နှံ့ခြင်းရှိမရှိ စစ်ဆေးရပါမည်။
အကောင်းဆုံး ကုသမှုကို ရရှိရန် အဆုတ်ကင်ဆာအမျိုးအစားသာမက သင့်ဆရာဝန်သည် ရောဂါအဆင့်ကို သေချာသိရန်လိုအပ်ပါသည်။ အဆင့်ကို သိရှိရန် CT Scans ၊ PET CT Scans ( သို့ ) MRI ဖြင့် အခြား မည်သည့်နေရာများသို့ ပျံ့နှံ့နေသည်ကို ရှာဖွေရပါမည်။ အဆုတ်ကင်ဆာသည် များသောအားဖြင့် ပြန်ရည်ကျိတ်များ ၊ ဦးနှောက် ၊ အရိုးများ ၊ အသည်းနှင့် အက်ဒရီနယ် ဂလင်းများသို့ ပျံ့နှံ့ပါသည်။
Small cell lung cancer ( SLC ) ၏ အဆင့်များ
- မပျံ့နှံ့သေးသော အဆင့် - ကင်ဆာသည် အဆုတ်တစ်ခုတည်း နှင့် အနီးနား တစ်သျှူး များတွင်သာ တွေ့ရပါသည်။
- ပျံ့နှံ့သောအဆင့် - ကင်ဆာသည် အဆုတ်အပြင်ဘက် တစ်သျှူး ( သို့ ) အခြားအဂါႅအစိတ်အပိုင်းများတွင် တွေ့ရပါသည်။
Non - small cell lung cancer ( NSLC )၏ အဆင့်များ
- ဖုံးကွယ်နေသော အဆင့် - ကင်ဆာသည် ပုံရိပ်မြင်စက်များ သို့ လေပြွန်အတွင်းကြည့် မှန်ပြောင်းဖြင့် အဆုတ်များအတွင်းတွင် မတွေ့ရပါ။ အဆုတ်ကင်ဆာဆဲလ်များသည် တံတွေး ( သို့) လေပြွန်ဆေးရည်များ ( လေပြွန်အတွင်းကြည့် မှန်ပြောင်းဖြင့် ကြည့်စဉ် နမူနာယူထားသော အရည် )
- အဆင့် ( 0 ) - ကင်ဆာဆဲလ်များသည် အဆုတ်အတွင်းဆုံးနံရံတွင်သာ ရှိပါသည်။ အကျိတ်သည် ၎င်းနံရံကို ဖောက်ပြီး မကြီးထွားသေးပါ ။ အဆင့် ( 0 ) အကျိတ်ကို ဤနေရာတွင်သာ ရှိသော ကင်ဆာ ( Carcinoma in Situ ) ဟု လည်း ခေါ်ပါသည်။
- အဆင့် ( ၁ ) - ကင်ဆာအကျိတ်သည် အဆုတ်ထဲတွင် သာ ရှိပါသည် ပြန်ရည်ကျိတ်များကို မပျံ့နှံ့သေးပါ ။
- အဆင့် ( ၂ ) - ကင်ဆာသည် ပြန်ရည်ကျိတ်များ၊ ရင်ခေါင်း ၊ ရင်ခေါင်းနှင့် ဝမ်းဗိုက်ကိုခြားထားသော နေရာ ၊ အဆုတ်များ ၏ အကာများ ၊ ( သို့ ) နှလုံး ကို ကာရံထားသော အပြင်အကာ ။
- အဆင့် ( ၃ ) - ကင်ဆာသည် နှလုံးနှင့် အဆုတ်များ ကြားရှိ ရင်ခေါင်းအတွင်း ပြန်ရည်ကျိတ်များကို ပျံ့နှံ့သွားသည် ။ သွေးကြောများသို့လည်း ရောက်ရှိပါသည် ။ ကင်ဆာသည် လည်ပင်းအောက်ပိုင်းသို့လည်း ပျံ့နှံ့သွားနိုင်သည်။
- အဆင့် ( ၄ ) - ကင်ဆာသည် အဆုတ်များ ၏ အခြားအစိတ်အပိုင်း များ ( သို့ ) ခန္ဓာကိုယ်၏ အခြားနေရာများသို့လည်း ပျံ့နှံ့သွားပါသည်။
ကုသမှုနည်းလမ်း က ဘာတွေရှိသလဲ ?
ကင်ဆာအဆင့်ပေါ်မူတည်၍ ကုသမှု၏ ရည်ရွယ်ချက်သည် ပျောက်ကင်းအောင် ၊ သက်တမ်းရှည်စွာ နေနိုင်ရေးအတွက် ရောဂါထိန်းချုပ်နိုင်အောင် ( သို့ ) ရောဂါလက္ခဏာများကို စီမံခန့်ခွဲနိုင်အောင် နှင့် ဘဝတွင် ပျော်ရွှင်စွာနေထိုင်နိုင်ရန် နောက်ဆက်တွဲ ဆိုးကျိုးများကို ကာကွယ်နိုင်အောင် ဖြစ်ပါသည်။ အောက်ပါကုသနည်းလမ်းများကို တစ်ခုတည်း ( သို့) ပေါင်းစပ်ကုခြင်းဖြင့် အသုံးပြုပါသည်။
တစ်နေရာတည်းတွင်သာ ဖြစ်နေသေးသော NON SMALL CELL LUNG CANCER
မပျံ့နှံ့သေးသော တနေရာတည်းတွင်သာ ဖြစ်နေသေးသော အဆုတ်ကင်ဆာများအတွက် , ကုသမှုနည်းလမ်းသည် ခွဲစိတ်ကုသခြင်း နှင့် ( သို့ ) ကင်ဆာဆေးသွင်းခြင်း ၊ ဓာတ်ရောင်ခြည်ပြကုသနည်း တစ်ခုတည်း ( သို့ ) ကင်ဆာဆေးသွင်းခြင်းနှင့် ဓာတ်ရောင်ခြည်ပြကုသနည်း ပေါင်းစပ်၍ ကုသနည်း - တို့ ပါဝင်ပါသည်။
ခွဲစိတ်ကုသနည်း
အဆုတ်ကင်ဆာ အတွက် ခွဲစိတ်ကုသခြင်းဆိုသည်မှာ ကင်ဆာအကျိတ်ရှိနေသာ တစ်သျှူးများ နှင့် အနီးနားရှိ ပြန်ရည်ကျိတ်များ ကို ဖြတ်ထုတ်ခြင်းဖြစ်ပါသည်။
ဓာတ်ရောင်ခြည်ပြကုသနည်း
ဓာတ်ရောင်ခြည်ပြကုသနည် သည် စွမ်းအားမြင့် ရောင်ခြည်များကို သုံး၍ ကင်ဆာဆဲလ်များ သတ်ခြင်းဖြစ်ပါသည်။ ၎င်းသည် ကုသသောနေရာတွင်သာ အကျိုးသက်ရောက်ပါသည်။
ကင်ဆာဆေးသွင်းခြင်း
ကင်ဆာဆေးသွင်းကုသခြင်းသည် ကင်ဆာသတ်သောဆေးများကို အသုံးပြုပြီး ကင်ဆာဆဲလ်များကို ကျုံ့စေ / သေစေနိုင်ပါသည်။ များသောအားဖြင့် ဆေးသွင်းခြင်းကို အသုံးပြုပါသည်။ ကင်ဆာဆေးများသည် သွေးကြောထဲသို့ ဝင်ရောက်ပြီး ထိုမှတဆင့် ခန္ဓာကိုယ် တကိုယ်လုံးရှိ ကင်ဆာဆဲလ်များကို အကျိုးသက်ရောက်ပါသည်။
အဆင့်နောက်ကျနေသော Non - small cell lung cancer ( NSLC )
Non - small cell lung cancer ( NSLC ) သည် အခြား အဂါႅများသို့ ပျံ့သောအခါ ကုသခြင်း၏ အဓိကရည်ရွယ်ချက်သည် ကင်ဆာကို ထိန်းချုပ်ရန်၊ ရောဂါလက္ခဏာများ သက်သာရန်နှင့် ဘဝတွင် ကောင်းမွန်စွာ နေနိုင်ရန် ဖြစ်ပြီး အသက်ပိုရှည်ရန်လည်း ဖြစ်ပါသည်။ ဖြစ်နိုင်ချေရှိသော ကုသမှုနည်းလမ်းများမှာ - ကင်ဆာဆေးသွင်းခြင်း ၊ ပစ်မှတ်ထားကုထုံး ( Targeted therapy ) နှင့် မိမိခုခံအားစနစ်သုံး ကုထုံး ( Immunotherapy ) တို့ပါဝင်ပါသည်။
ပစ်မှတ်ထားကုထုံး
Targeted therapy ပစ်မှတ်ထားကုထုံးသည် ကင်ဆာဆဲလ်များ ကြီးထွားခြင်းနှင့် ပျံ့နှံ့ခြင်းကို တားဆီးရန်သုံးသော ဆေးများ ဖြစ်ပါသည်။ ဥပမာ - အဆုတ်ကင်ဆာဆဲလ်အချို့တွင် ဆဲလ်ကွဲပွားခြင်း နှင့် ကြီးထွားခြင်းကို မြန်ဆန်စေသော ပရိုတင်းတစ်မျိုးဖြစ်သည့် EGFR များစွာပါဝင်ပါသည်။ EGFR ကို တားဆီးပိတ်ပင်သော ဆေးများ ဖြစ်သည့်(erlotinib, afatinib, gefitinib, osimertinib) တို့သည်EGFR မှ အချက်ပြခြင်းကို တားဆီးပြီး ကင်ဆာဆဲလ်များ ကြီးထွားမှုကို ရပ်စေပါသည်။ ၎င်းဆေးများသည် သွေးကြောထဲသို့ ရောက်ရှိပြီး တကိုယ်လုံးရှိ ကင်ဆာဆဲလ်များကို အကျိုးသက်ရောက်ပါသည်။ ပျံ့နှံ့သော EGFR ရှိသော Non - small cell lung cancer ( NSLC )အဆုတ်ကင်ဆာများတွင် ပစ်မှတ်ထားကုထုံးကို အသုံးပြုနိုင်ပါသည်။
မိမိခုခံအားစနစ်သုံးကုထုံး ( Immunotherapy )
မိမိခုခံအားစနစ်သုံးကုထုံး ( Immunotherapy ) သည် ခန္ဓာကိုယ်၏ ခုခံအားစနစ်ကို မြင့်တက်စေပြီး ကင်ဆာဆဲလ်များကို တိုက်ထုတ်စေရန် အထူးပြလုပ်ထားသော ကင်ဆာကုသနည်းလမ်းဖြစ်ပါသည်။ ကင်ဆာဆဲလ်များတွင် ဖုံးကွယ်လှည့်စားနိုင်သော စွမ်းရည်ရှိပြီး ခန္ဓာကိုယ်၏ ခုခံအားစနစ်က ၎င်းလှည့်စားသော ဆဲလ်များကို ဖျက်ဆီးရန် မတတ်နိုင်တော့ပေ။ Immunotherapyသည် ခုခံအားစနစ်ကို မြင့်တက်စေပြီး ၎င်းလှည့်စားနေသော ဆဲလ်များကို ရှာဖွေ ဖျက်ဆီးဖို့ လွယ်ကူစေရန် ခုခံအားစနစ်ကို မြှင့်တင်ပေးခြင်းဖြင့် ကူညီပေးပါသည်။ ရလဒ်အနေဖြင့်အချို့သော ကင်ဆာများတွင် အခြားသောကုသနည်းများနှင့် နှိုင်းယှဥ်လျှင် ပိုမိုရှည်ကြာစွာထိန်းချုပ်နိုင်စေပါသည်။
ကြိုတင်ရောဂါရှာဖွေစစ်ဆေးခြင်း
ကြိုတင်ရောဂါရှာဖွေစစ်ဆေးခြင်း သည် လူတစ်ဦးတစ်ယောက်တွင် ရောဂါလက္ခဏာမပြခင် ကင်ဆာရှိမရှိစစ်ဆေးခြင်းကို ဆိုလိုပါသည်။ ကင်ဆာကို စောစီးစွာ တွေ့ရှိအောင် ကြိုတင်စစ်ဆေးခြင်းပြီး စောစီးစွာ ကုသနိုင်ဖို့ ရည်ရွယ်ပါသည်။ အဆုတ်ကင်ဆာအတွက် ကြိုတင်စစ်ဆေးနိုင်သော နည်းလမ်းများမှာ များစွာ ရှိသည့်အနက် ဖြစ်နိုင်လျှင် ဖြစ်နိုင်ချေများသောလူများကို အဆုတ်ပုံရိပ်မြင်စက် low dose CT lung scans ဖြင့် စစ်ဆေးကြပါသည်။
အဆုတ်ကင်ဆာအတွက် သင့် ဖြစ်နိုင်ချေအချက်များ ကြိုတင်စစ်ဆေးခြင်း၏ အကျိုးအပြစ်များကို သင့် ဆရာဝန်နှင့် သေချာဆွေးနွေးတိုင်ပင်ရန်မှာ အလွန်အရေးကြီးပါသည်။ အခြားသော ကျန်းမာရေး ဆုံးဖြတ်ချက်များကဲ့သို့ ကြိုတင်စစ်ဆေးခြင်းသည်လည်း တစ်ယောက်ချင်းစီအလိုက်ရှိပါသည်။
CanHOPE က စင်ကာပူနိုင်ငံ Parkway Cancer Centre မှ စီစဉ်ဆောင်ရွက်ပေးတဲ့ အကျိုးအမြတ်မယူဘဲ ကင်ဆာဆွေးနွေးတိုင်ပင်ပေးခြင်းနဲ့ အကူအညီများကို ဆောင်ရွက်ပေးနေပါတယ်။ CanHOPE မှာ ကင်ဆာကုသမှုများနဲ့ ကင်ဆာရောဂါများစွာအကြောင်းနဲ့ ပတ်သက်သော ပြည့်စုံတဲ့သတင်းအချက်အလက်များရှိတဲ့ အတွေ့အကြုံ ဗဟုသုတပြည့်တဲ့ စောင့်ရှောက်မှုပေးနိုင်တဲ့ အဖွဲ့တွေ ရှိပါတယ်။
CanHOPE အနေနဲ့
- ကင်ဆာရောဂါကာကွယ်ခြင်း၊ လက္ခဏာများ၊ ဖြစ်နိုင်ခြေများ၊ ကြိုတင်စစ်ဆေးနိုင်တဲ့စစ်ဆေးမှုများ၊ ရောဂါရှာဖွေခြင်း၊ လက်ရှိကုသမှုများနဲ့ လေ့လာမှုများ ပါဝင်တဲ့ ခေတ်ပေါ် ကင်ဆာသတင်းအချက်အလက်များ ပေးနိုင်ပါတယ်။
- ကင်ဆာရောဂါဆိုင်ရာ ဝန်ဆောင်မှုများအဖြစ် ရောဂါကြိုတင်စစ်ဆေးခြင်း၊ ရောဂါရှာဖွေခြင်း၊ ကုသမှုစင်တာများနဲ့ သက်ဆိုင်တဲ့အထူးကုဆရာဝန်များဆီကို လမ်းညွှန်ပေးပါတယ်။
- ကင်ဆာနှင့် ပက်သက်ပြီး ဆွေးနွေးတိုင်ပင်ပေးခြင်း၊ ကင်ဆာကုသမှုဘေးထွက်ဆိုးကျိုးများကို ရင်ဆိုင်ဖို့ အကြံဉာဏ်များပေးခြင်း၊ ကင်ဆာရောဂါကို ရင်ဆိုင်ဖို့၊ အစားအသောက်နဲ့ အာဟာရဆိုင်ရာများကို ဆွေးနွေးတိုင်ပင်ပေးပါတယ်။
- ကင်ဆာရောဂါခံစားနေရသူများနှင့် မိသားစုဝင်များ၊ ပြုစုစောင့်ရှောက်သူများကို စိတ်ခံစားမှုဆိုင်ရာနှင့် စိတ်ကျန်းမာရေး လူမှုရေးဆိုင်ရာ အထောက်အပံ့များပေးပါတယ်။
- ကင်ဆာရောဂါလူနာများနှင့် ပြုစုစောင့်ရှောက်သူများ ကင်ဆာရောဂါအကြောင်းကို ပိုမိုသိရှိပြီး သတိထားနိုင်ဖို့ အစုအဖွဲ့လိုက်လုပ်ဆောင်ခြင်း၊ အသိပညာများဖြန့်ဝေခြင်း၊ အထောက်အပံ့အကူအညီများ လုပ်ဆောင်ခြင်းများ ဆောင်ရွက်ပေးပါတယ်။
- ပြန်လည်ကျန်းမာသန်စွမ်းဖို့ အကူအညီများအတွက် လိုအပ်တဲ့အချက်အလက်များ ဆောင်ရွက်ပေးပါတယ်။
- ကင်ဆာရောဂါရင့်သူများ ဘဝနေပျော်ရေးအတွက် စောင့်ရှောက်မှုဆိုင်ရာဝန်ဆောင်မှုများကို ဆောင်ရွက်ပေးပါတယ်။
CanHOPE အဖွဲ့အနေနှင့် လူနာတိုင်းကို မျှော်လင့်ချက်အနည်းငယ်ပဲ ဖြစ်ဖြစ်ရရှိဖို့အတွက် မျှဝေမှုများ လုပ်ဆောင်ရင်း လူနာအတွက် အထောက်အပံ့နဲ့ ဂရုစိုက်မှုများရရှိစေဖို့ လူနာတွေနဲ့အတူ ကင်ဆာကုသမှုခရီးစဉ်တလျှောက်မှာ အတူရှိနေပါတယ်။